Мрежата за рурален развој слави 15 години посветеност кон руралните заедници
Во 2025 година, Мрежата за рурален развој на Македонија го одбележа својот 15-годишен јубилеј — значајна пресвртница што ја рефлектира континуираната заложба за подобрување на квалитетот на живот во руралните средини низ целата држава. Овој настан не само што претставуваше ретроспектива на нашето постоење, туку и афирмација на вредностите што ја водат Мрежата: соработка, иновација, инклузивност и одржливост.
15 години визија, партнерства и резултати
Од своето основање, Мрежата за рурален развој прерасна во силна и влијателна платформа што ги обединува сите клучни чинители на руралниот развој — локални организации, земјоделци, експерти, институции и граѓански иницијативи. Преку соработка и посветена работа, таа ја зајакна улогата на руралните заедници и ги промовираше вредностите на одржливиот развој.Во изминатите 15 години:
- реализиравме стотици иницијативи и проекти,
- креиравме и поддржавме политики за рурален развој,
- објавивме бројни истражувања и публикации,
- изградивме платформи за соработка и споделување на знаење.
Овој јубилеј беше можност да се истакнат постигнувањата, но и да се сподели мотивацијата за иднината на руралниот развој во Македонија.
Свечен настан со инспиративни содржини
Јубилејот беше одбележан со настан што ги обедини членките на Мрежата, долгогодишните соработници и поддржувачи, во атмосфера на благодарност, заедништво и заеднички поглед кон иднината. Програмата опфати:
- Презентација на историјата и развојот на Мрежата: клучни активности, резултати и влијание.
- Воведна презентација од проф. д-р Александра Мартиновска Стојческа, која говореше за важноста на националните политики за одржливи прехранбени системи и живеалишта во руралните средини.
- Претставување на Академијата „Од Фарма до Виљушка“ – програма која промовира интегриран и холистички пристап кон руралниот развој, поврзувајќи го производството на храна со одржливо живеење и локално учество.
Награди за инспиративни иницијативи
Еден од највпечатливите моменти на настанот беше доделувањето на наградите од Академијата „Од Фарма до Виљушка“ за три извонредни и иновативни иницијативи:
- Здружение Еко Тим Исток – за проектот „Намалување на отпадна пластика во Општина Кочани преку систем за производство на еко плочки од ПЕТ пластика“.
- Здружение ПОЛИМАТ 13 – за иницијативата „Ден на Астрагалусот“, посветена на зачувување на ретката автохтона билка Astragalus physocalyx.
- Прва Органска Задруга – Валандово – за проектот „Нашата Заедничка Иднина“, кој промовира здружување, иновации и развој на органско земјоделство.
Овие иницијативи го покажуваат потенцијалот што постои во руралните заедници и важноста од нивна поддршка и промоција.
Прослава на заедништвото и иднината
Настанот заврши со неформална дружба, коктел и музика – во духот на заедништво, благодарност и инспирација за нови предизвици и успеси.
Со гордост гледаме назад на изминатите 15 години, но уште поодлучно гледаме напред. Мрежата за рурален развој останува отворена за сите кои веруваат во потенцијалот на рурална Македонија и сакаат да придонесат за нејзиниот одржлив развој.
Presentation_of_15_years_of_work_RDN
